Mërgim Berisha në mes katër kombëtareve

“Vetëm Shqipëria më ka kërkuar njëherë, por në atë kohë kam qenë i dëmtuar. Gjithashtu mund të luaj për Kosovën, Gjermaninë ose Austrinë. Nuk e kam vendosur ende”, ka thënë Berisha

Mërgim Berisha po kalon në formë të jashtëzakonshme dhe ai po kërkohet nga shumë skuadra, por edhe disa Kombëtare, shkruan albinfo.ch.

Forma e tij nuk ka kaluar pa u vërejtur edhe disa media ndërkombëtare, ndër to edhe ‘Bild’ e Gjermanisë.

Në rubrikën javore të kësaj gazete ku promovohen talentet e rinj të futbollit nëpër Evropë, këtë radhë është përzgjedhur Berishën.

“Bild” përshkruan talentin e tij me topin, teksa gjithashtu zbulon situatën e ekipit përfaqësues me të cilin sulmuesi do të aktivizohet.

“Vetëm Shqipëria më ka kërkuar njëherë, por në atë kohë kam qenë i dëmtuar. Gjithashtu mund të luaj për Kosovën, Gjermaninë ose Austrinë. Nuk e kam vendosur ende”, është shprehur ai për mediat austriake.

Prindërit e Berishës janë nga Kosova, por futbollisti është lindur në Gjermani.