Gjergjaj, më 17 dhjetor kthehet prapë në ring

Lajmi konfirmohet nga trajneri dhe menaxheri Angelo Gallina. “Kundërshtari ende nuk është bërë i ditur”, ka thënë ai

Arnold Gjergjaj ka gjetur forcë që prapë të ngjitet në ring. Boksieri shqiptaro – zviceran i kategorive të rënda, më 17 dhjetor, në “Kaserne”, Bazel do të provojë edhe një herë të tregojë profesionizmin e tij në boks, përkundër humbjes në dy raunde kundër David Haye në maj të vitit 2016.

Lajmi konfirmohet nga trajneri dhe menaxheri Angelo Gallina, shkruan basellandschaftszeitung, përcjell “albinfo.ch”.

“Kundërshtari ende nuk është bërë i ditur”, ka thënë trajneri Angelo Gallina. “Përkundër problemeve financiare ne kemi gjetur forcën dhe optimizmin për t’u ndeshur përsëri dhe kjo për të arritur majat e boksit botëror”, thekson ai.

Përveç humbjes kundrejt Haye, Gjergjaj nuk ka asnjë humbje tjetër. Ai ka madje 29 fitore, prej të cilave 21 me nokaut.