Sonte Teatri “Oda” me “Doruntinën” në Cyrih

Dy shfaqjet e dramës "Doruntina" jepen më 28 dhe 29 nëntor me fillim në orën 19.30, në teatrin "Miller`s" në Cyrih. albinfo.ch është sponsor medial i festivalit

Në “Secondotheaterfestival”, festival ky i rëndësishëm zviceran i teatrit që po mbahet në Cyrih, sonte dhe nesër (28 dhe 29 nëntor) jepet shfaqja “Doruntina”, që është një bashkëprodhim i teatrit “Oda” të Prishtinës dhe “Blessed Unrest” të Nju Jorkut.

Festivali ka filluar më 20 nëntor ndërsa shfaqjet në konkurrencë për çmim kanë filluar të jepen më 25 nëntor, kur dhe është bërë hapja solemne e festivalit. “Doruntina” është e treta nga gjithsej katër shfaqjet konkurruese për çmimin e festivalit.

Është hera e parë që në këtë festival i cili sivjet ka edicionin e tij tüë nëntë, jepet edhe një shfaqje nga Kosova dhe në përgjithësi një shfaqje shqiptare.

Ndër aktivitetet e shumta që zhvillohen në kuadrin e këtij festivali, ku përsfhihen debate dhe punëtori të ndryshme, është edhe prezantimi i kuzhinave të vendeve prej nga jepen shfaqjet. Kështu, më 28 dhe 29 nëntor, para shfaqjes, duke filluar nga ora 18.00 në ambientin e hapur pranë teatrit “Miller`s” piqet flija, specialiteti i njohur shqiptar. Të interesuarit mund të shikojnë procesin e përgatitjes së flisë dhe ta shijojnë atë.

“Doruntina”, është një dramë që ndërtohet mbi legjendën e njohur të vëllait që i jep besën motrës dhe këtë besë do ta përmbushë edhe pas vdekjes së tij.  Duke qenë një bashkëprodhim në mes të teatrit “Oda” të Prishtinës dhe atij “Blessed Unrest” të Nju Jorkut dhe për këtë arsye teksti i shfaqjes lexohet shqip dhe anglisht, sqaron udhëheqësja e festivalit, Gjyle Julie Krasniqi për albinfo.ch.

Autorë të tekstit të frymëzuar edhe në romanin “Kush e solli Doruntinën” të Kadaresë, janë Matt Opartny dhe Lirak Çelaj. Me emocionalitetin e vet intensiv dhe dinamikën psikike drama “Doruntina” është pritur me entuziazëm nga publiku, kudo ku ajo është shfaqur. Shfaqja kosovaroamerikane ka qenë për dy sezone të plota “e shitur” në Nju Jork ndërsa ndodhet në një turne nëpër Shqipëri, Maqedoni dhe Kosovë. Në Cyrih ajo do të jepet dy net.

Regjinë e kanë bërë Jessica Burr dhe Florent Mehmeti ndërsa rolet kryesore i luajnë Ilire Vinca. Eshref Durmishi, Nëntor Fetiu, Semira Latifi, Tatyana Kot, Poppy Liu, Matt Opatrny, Nathan Richard Wagner. Emrat e perzier të aktorëve dhe të gjithë stafit flasin për një bashkëpunim interesant të dy teatrove “Oda” dhe “Blessed Unrest”. Ato realizojnë shfaqje të përbashkëta, në dy gjuhë (shqip dhe anglisht) që nga viti 2005. Ky partneritet i dy teatrove të pavarura është kurorëzuar tashmë me shumë suksese dhe përbën një urë lidhjeje kulturore në mes Kosovës dhe SHBA-së.

Dy shfaqjet e dramës “Doruntina” jepen më 28 dhe 29 nëntor me fillim në orën 19.30, në teatrin “Miller`s” që gjendet në Seefeldstrasse 225,  8008, Zürich.

Platforma albinfo.ch është sponsor medial i festivalit “Secondotheaterfestival”

Numrat e telefonit për bileta

Biletat standarde për këtë shfaqje kushtojnë nga 36 franga ndërsa për kategori të ndryshme si për nxënës, studnetë apo me abonamentë të ndryshëm ato mund të kushtojnë 33 gjegjësisht 20 franga, sipas kategorisë.