Rrëfimi i kapitenit të Kosovës

Unë i premtova babait tim se në momentin që do të kishte drejtë Kosova të luaj me lejen e UEFA-s do ta merrja këtë vendim. Nuk jam pishman për këtë zgjedhje”, tha Ujkani

Kapiteni i Përfaqësueses së Kosovës, Samir Ujkani në një intervistë për mediat franceze ka rrëfyer kalimin nga Shqipëria në Kosovë, por edhe shumëçka tjetër, shkruan albinfo.ch.

“Nuk mund t’i kuptojë ata që më gjykojnë për largimin tim nga Shqipëria në Kosovë. Unë kam lindur në Kosovë, kam përjetuar luftën dhe kam dashur që ta ndihmojë vendlindjen time sapo më është dhënë mundësia. Trajneri De Biasi ishte pengesë për kalimin tim te Kosova, mirëpo presidenti i Federatës, Armand Duka më mundësoi kalimin. Mendoj që De Biasi u frikësua se të tjerët do ta ndiqnin rrugën time”, ka thënë Ujkani.

Ai nuk është penduar që ka zgjedhur Kosovën. “Pas zgjedhjes që kam bërë e kam humbur Kampionatin Evropian dhe respektin e shumë njerëzve në Shqipëri, mirëpo tani jam i lumtur. Unë i premtova babait tim se në momentin që do të kishte drejtë Kosova të luaj me lejen e UEFA-s do ta merrja këtë vendim. Nuk jam pishman për këtë zgjedhje”, tha Ujkani.

Djaloshi ka thënë se në ekipin e Kosovës është një atmosferë e jashtëzakonshme dhe se të gjithë djemtë e Përfaqësueses janë të lidhur shumë me vendlindjen.