Gjergjaj, rikthehet me 17 dhjetor përballë boshnjakut Jasmin Hasiç

Jasmin Hasiç është jë boksier jo shumë i njohur i cili nga nëntë ndeshje ka fituar tetë. Më 17 dhjetor të dy boksierët do të matin forcat e tyre në Bazel të Zvicrës me një lojë prej tetë rundesh

Boksieri i peshave të rënda, Arnold Gjergjaj rikthehet sërish në ring. Pas afro shtatë muajsh nga disfata  e parë e tij nga David Hye, Gjergjaj ka gjetur forcen për t’u ngjitur sërish në ring. Të shtunën ai do të kryqëzojë dorëzat me boksierin boshnjak Jasmin Hasiç, shkruan “albinfo.ch”.

Qëllimi i tij është vetëm një titull botëror. Para se të rrahet në ring në muajin maj nga boksieri anglez David Haye, boksieri shqiptar Arnold Gjergjaj ishte më afër se kurrë titullit botëror. Por vetëm pas dy rundeve, Arnoldi u gjunjëzua duke pësuar edhe humbjen e parë në karrierën profesioniste. Tani për të arritur prapë qëllimin e tij, i duhet t`i kalojë disa pengesa.

Pengesa e parë është boksieri boshnjak Jasmin Hasiç. Një boksier jo shumë i njohur i cili nga nëntë ndeshje ka fituar tetë.  Më 17 dhjetor të dy boksierët do të matin forcat e tyre në Bazel të Zvicrës me një lojë prej tetë rundesh. Për këtë ndeshje tregon, trajneri i tij Angelo Gallina:

“Arnoldi duhet të jetë një model se si duhet vazhduar ëndrrën. Pas humbjes ndaj David Haye, Gjergjaj kishte kërkuar për të përfunduar karrierën e tij. Por, ishte familja e tij që i dha kurajë që të kthehet prapë në ring”, raportojnë mediat zvicerane.

Boksieri i peshave të rënda është mjaft i koncentruar për të realizuar ëndrrën e tij. Kështu, ai planifikon që duelin e të shtunës ta përfundojë sa më mirë, për të vazhduar ndoshta me një tjetër në pranverë, dhe pas një viti të këtë një luftë të madhe me ndonjë boksier të njohur botëror.