Zvicra e 11-ta, Kosova e Shqipëria në vend të njëjtë

Zvicra ka përmbyllur vitin 2016 në vendin e 11-të në botë në renditjen e FIFA, kurse Shqipëria në atë të 49-të. Kosova është në vendin e 165-të

Përfaqësuesja e Zvicrës që ka gjashtë shqiptarë në radhët e saj (Xherdan Shaqiri, Granit Xhaka, Admir Mehmedi, Valon Behrami, Blerim Xhemaili e Shani Tarashaj) zë vendin e 11-të me 1129 pikë në renditjen e FIFA-s për muajin dhjetor dhe njëkohësisht në këtë vend përfundon vitin 2016, shkruan albinfo.ch.

Kosova dhe Shqipëria nuk kanë ndryshuar pozitat në ranglistën e re të publikuar nga FIFA. Kosova mbetet në pozitën e 165-të derisa Shqipëria mbetet e 49-ta.

Ndryshime nuk ka as në pozitat e para të kësaj rangliste. Në pozitën e parë mbetet Argjentina, ndërsa pas saj është Brazili. Pozita e tretë i takon Gjermanisë e ndjekur nga Kili. Top pesëshen e mbyll Belgjika.