15 mijë refugjatë janë kthyer vullnetarisht nga Gjermania në Shqipëri

Duhet pasur parasysh se një familje prej pesë anëtarësh nëse kthehet vullnetarisht, “shpërblehet” me 4200 euro, që i jepen krahas ndihmës bazë

Me 55 mijë persona që e kanë lëshuar vullnetarisht Gjermaninë gjatë këtij viti, është arritur numri më i madh i kësaj kategorie që nuk është regjistruar që prej 16 vitesh. Kthimi vullnetar është bërë edhe në bazë të joshjes financiare që ka bërë shteti gjerman për të kthyerit.

Siç shkruan “Süddeutsche Zeitung”, duke iu referuar një vlerësimi të bërë nga Zyra Federale për Migracion dhe Refugjatë (BAMF), kthimi i detyruar (me dëbim) ka qenë më shumë se përgjysmë më i vogël se ai vullnetar. Vetëm rreth 25 mijë refugjatë i ka kthyer me dhunë shteti gjatë vitit 2016 në vendet e tyre të prejardhjes.

Ndërkaq është interesante se numri me distancë më i madh i të kthyerve në mënyrë vullnetare është ai i shtetasve shqiptarë, transmeton albinfo.ch. Bëhet fjalë për 15 mijë persona nga Shqipëria të cilët e kanë shfrytëzuar këtë mundësi kthimi të mbështetur materialisht. Në Kosovë, Irak dhe në Serbi në këtë mënyrë janë kthyer nga 5000 shtetas të vendeve përkatëse.

Kur jemi te ballkanasit, shkruan gazeta, ata, duke mos pasur pothuajse fare shanse për të fituar azilin, kanë preferuar të mos e presin dëbimin dhe kanë përfituar nga ndihma për kthim vullnetar.

Duhet pasur parasysh se një familje prej pesë anëtarësh nëse kthehet vullnetarisht, “shpërblehet” me 4200 euro, që i jepen krahas ndihmës bazë, përcjell albinfo.ch

Stimulimi në fjalë, që mendohet si një “ndihmë për startim”  ndryshon varësisht nga vendi ku kthehen refugjatët  dhe mosha e fëmijëve të tyr. Ai mund të sillet në mes të 1000 dhe 3000 euro.