Shtyhet Kuvendi i Rrjetit të Bizneseve Shqiptare në Zvicër

Kuvendi i 2-të zgjedhor i Rrjetit të Bizneseve Shqiptare në Zvicër është shtyrë për një datë të pacaktuar, ndërsa ishte paraparë të mbahet më 21 janar 2017, në Bernë, në Hotel Bären, Bernstrasse 25, 3072 Ostermundigen.

“Anëtarë të Rrjetit të Bizneseve Shqiptare në Zvicër. Të nderuara dhe shumë të respektuara biznese shqiptare në Zvicër. Për shkak të rëndësisë që ka protesta e datës 21 janar 2017, në orën 14 në Francë, e cila i dedikohet lirimit të pakusht të z.Ramush Haradinaj, i cili qe disa ditë është duke u mbajtur nën mbikëqyrje nga autoritetet franceze në bazë të një fletarrestimi të lëshuar nga Serbia, kryesia në mënyrë unanime ka vendosur që zgjedhjet për kryetarin dhe Kryesinë e RRBSHZ-së, të cilat kanë qenë të parapara të mbahen më 21 janar në Bernë, të shtyhen për një kohë të pacaktuar”, thuhet në njoftimin e Rrjetit…

“Ne mendojmë se ky vendim është shumë i arsyeshëm kur kemi parasysh rëndësinë që ka pjesëmarrja e secilit prej nesh në këtë protestë. Prandaj kemi vlerësuar se tubimi do të ishte një angazhim shtesë për shumë afaristë, duke u pamundësuar atyre pjesëmarrjen në protestën kushtuar lirimit të z.Ramush Haradinaj”, thuhet më tutje në njoftim.

Kryetari aktual i Rrjetit, Naser Mustafa, ka kërkuar mirëkuptimin dhe ka thënë se do t’i informojmë me kohë për kohën, vendin dhe formën e zgjedhjeve të Rrjetit Shqiptar të Bizneseve në Zvicër.