Matter: „Kanuni në Kosovë, në perëndim e sipër“

Eksperti shumëvjeçar zviceran për ndihmë azilkërkuesve, Rainer Matter, në një intervistë për „Basler Zeitung“, lidhur me mundësinë e gjakmarrjes në rastin e Pfaffikonit, ka deklaruar se koha e zbatimit të Kanunit në Kosovë është duke perënduar, pasi në dhjetë vitet e fundit, Kosova ka pësuar ndryshime rrënjësore në urbanizmin dhe modernizimin e saj.

Në një qytet të madh siç është Prishtina, të rinjtë mund të jetojnë në mënyrë bashkëkohore e që nuk është njësoj sikur në zonat rurale. „Një gjë është e qartë, domethënia e Kanunit është në rënie e sipër“, ka deklaruar Matter.

Në lidhje me vrasjen e Pfaffikonit, ai ka thënë se një akt i tillë nuk ka qenë i motivuar nga tradita kosovare, për shkak të ndarjes së çiftit bashkëshortor, e kurrsesi për vrasjen e një nëpunëseje sociale.

„Edhe në Kosovë është shtuar numri i ndarjeve të çifteve, e që në të kaluarën ka qenë një raritet, sidomos kur është bërë fjalë për iniciativën nga gjinia më e bukur“, ka përfunduar Matter. Ndryshe, ai është edhe autor i veprës „Domethënia e traditës në Kosovën e sotme“.