Mbrëmje me poezinë e Vaxhid Xhelilit

E enjte 1 dhjetor 2011, nga ora 19

Instituti „Deutsch in Fribourg Lehren” (Delif) fton dashamirësit e letërsisë që të marrin pjesë në mbrëmjen e leximit letrar me poetin shqiptar, Vaxhit Xhelilin. Leximi mbahet të enjten, më 1 dhjetor dhe fillon në orën 19.00 në në Rue de Rome 1, në Fribourg.

Vaxhid Xhelili vjen nga Bujanoci, ku ka mbaruar shkollimin e mesëm ndërsa studimet për letërsinë shqipe i ka kryer në Prishtinë.

Në Zvicër ka ardhur në vitin 1989 si punëtor sezonal, pasi që në Kosovë nuk kishte mundur të gjente punë dhe i mungonte perspektiva. Ndërkohë ai ka mësuar shumë mirë gjermanishten dhe ka studiuar për punën sociale dhe politikën sociale në Universitetin e Friburgut.

Xhelili shkruan që nga mosha 20 vjeçare, ndërsa deri më tash ka botuar disa vëllime me poezi. Përkthimet epara të poezisë së tij në gjuhen gjermane janë bërë në vitin 1998. Një libër poezish i është përkthyer më vonë në gjuhën gjermane “Sehnsucht nach Etleva” (Malli për Etlevën). Për poezinë e tij, Vaxhid Xhelili ka marrë shumë lëvdata për meritën se është lidhur me traditën më të mirë të poezisë shqiptare dhe nga ana tjetër për faktin se në vargjet e tij përdor figura të fuqishme të cilat i përcjell edhe te lexuesit.

Në mbrëmjen poetike në Friburg vargjet do t`i lexojnë autori, Vaxhid Xhelili dhe aktori e regjisori Otto Huber së bashku me Katja Frühaufova dhe Vera Förste.

Pas leximit, pjesëmarrësit në një apero do të mund të bashkëbisedojnë me autorin.