“Deklarata e Pavarësisë” merret nën mbrojtje ligjore

Dhjetë vjet pas shpalljes së pavarësisë së Kosovës, tek tash institucionet e vendit po mendojnë ta vënë nën mbrojtje “Deklaratën e Pavarësisë” së Kosovës.

Deklarata është duke u futur në Listën e trashëgimisë kulturore në mbrojtje të përkohshme, e cila është nënshkruar tashmë nga ministri i Kulturës, Kujtim Gashi.

Listës i janë shtuar 45 asete të tjera, pos atyre që mbroheshin me atë të vitit të kaluar, që numëronte 1.534. Tashmë shteti mbron përkohësisht 1.580 asete të trashëgimisë kulturore. Vetëm dy janë futur në kategorinë e trashëgimisë së luajtshme, përcjell albinfo.ch.

Kësisoj, bashkë me pergamenën qindravjeçare – me tekstin e Deklaratës nënshkruar më 17 shkurt të vitit 2008 prej 120 deputetëve, kryetarit të Kuvendit, kryetarit të Kosovës dhe kryeministrit – në këtë kategori mbrohet edhe mozaiku me portretin e Shën Terezës, i punuar me një milion kapëse teli në Muzeun e Kosovës nga Saimir Strati, në nëntor të vitit të kaluar, shkruan “Koha Ditore”.