Daçiq nuk i ka kënduar vetëm Erdoganit, por edhe Edi Ramës

Ministri i Punëve të Jashtme i Serbisë, Ivica Daçiq, ka folur për këngën që i këndoi presidentit turk Erdogan gjatë vizitës së tij në Beograd, në fillim të kësaj jave. Në një tekst autorial për gazetën ‘Alo’, të shkruar për 100 ditëshin e qeverisë së re serbe, ai ka thënë se i ka kënduar edhe kryeministrit të Shqipërisë, Edi Rama, apo edhe politikanëve të njohur të Evropës.

Daçiq ka thënë se me këtë formë diplomacie Serbia po fiton dhe do të fitojë, pasi ajo e mëparshmja e ultimatumeve dhe e forcës ka treguar se është dështim, përcjell albinfo.ch.

“Po, kam kënduar dhe do të këndoj. I kam kënduar Merkel-it, Sergej Lavrovit, Ashtonit, Ramës, Erdoganit dhe Putinit. Do t”i këndoj edhe Trump-it nëse ka nevojë, nuk më vjen turp. Diplomacia dhe fitoret diplomatike nganjëherë arrihen me këngë, me sharm, me shaka të mira dhe jo vetëm me ultimatume, reciprocitet dhe forcë. Serbia nuk është në pozitë të shtyhet me gjoks, e pamë se si kjo na ka sjellë dekada prapa”, ka shkruar Daçiq.