Gjilani po bëhet gati për 28 nëntor

Komuna e Gjilanit ka nisur përgatitjet për shënimin e Festës Kombëtare të 28 Nëntorit, datë kjo në të cilën do të zbulohet shtatorja e heroit kombëtar Idriz Seferi, si dhe bustet e Halim Oranës, Muharrem Ibrahimit, Reshat Ymerit, Xhavit Ahmetit dhe Esat Berisha, ka njoftuar faqja e Komunës.

Kryetari i Gjilanit, Lutfi Haziri, ka kërkuar nga të gjithë sipas përgjegjësive të ndara më parë, të kryejnë punët e përcaktuara për shënimin e festës kombëtare, që do të jetë ngjarja kryesore në Republikën e Kosovës, për të cilën kanë konfirmuar pjesëmarrjen e tyre niveli më i lartë shtetëror i Republikës së Kosovës, Shqipërisë dhe mysafirë të tjerë të shumtë, përcjell albinfo.ch.

Përpos shtatores së Idriz Seferit, që do të vendoset në qendër të qytetit të Gjilanit, po ashtu në pikat më të frekuentuara do të vendosen edhe pesë buste të figurave me një bagazh të madh kombëtar, patriotik dhe arsimor.

I pari i Gjilanit ka shtuar se edhe në pjesën e burgut do të bëhen intervenime që do ta bëjnë më të hapur, sikur që ka bërë të ditur vendosjen e pllakës, e cila do të bartë historinë famëkeqe të shqiptarëve që kanë kaluar nëpër këtë burg, në kohët më të vështira para luftës së vitit ’99.