Në Gjilan dhe Pejë digjet flamuri maqedonas

Qytetarë dhe familjarë të Grupit e Kumanovës, të dënuar sot nga gjykata maqedonase, kanë protestuar sonte në Pejë dhe Gjilan, duke e djegur flamurin e Maqedonisë, raportojnë mediat vendore.

Derisa në Pejë ishin familjarë dhe qytetarë që shprehnin paanësinë dhe thërrisnin për drejtësi, në Gjilan ishin grupi i tifozëve “Skifterat” që protestonin kundër dënimit.

“Në shenjë revolte për padrejtësitë e shtetit kukull sllavomaqedon ndaj heronjve tanë, sonte pranë shtatores së legjendarit Agim Ramadani – Katana dogjëm poçavrën e tyre identifikuese. I bëjmë thirrje të gjithë burrështetasve shqiptarë të ngriten në mbrojtje të popullit të persekutuar shqiptarë në Iliridë. Shqipërinë do ta bëjmë!”, thuhet në postimin e ‘Skifterave’, përcjell albinfo.ch.

Protestuesit u kanë bërë thirrje shqiptarëve kudo që janë që të mbrojnë të drejtat e tyre, kundër padrejtësisë së bërë nga sllavo-maqedonasit.