Nuk lejohet ngritja e minares në Xhaminë e Langenthalit

Drejtoria komunale dhe ajo kantonale për ndërtim e kishin dhënë lejen për ngritjen e minares por një komitet kundërshtarësh ishte ankuar

Mbi kulmin e Qendrës Kulturore Islamike në Langenthal të kantonit të Bernës nuk do të lejohet ngritja e minares. Kështu ka vendosur Gjykata Administrative e kantonit, duke miratuar ankesën e një grupi kundërshtarësh të minareve.

Kjo qendër islamike i takon komunitetit të besimtarëve myslimanë shqiptarë të Langenthalit.

Minarja, është një mbindërtim thjesht simbolik dhe nuk ka ndonjë funksion praktik dhe, sipas rregullave të ndërtimit në komunë, ngritja e saj nuk është e lejueshme. Por Gjykata Administrative në vendimin e saj nuk ka dashur të ndërlidhet me rezultatin e referendumit të vitit 2009 i cili ndalonte ndërtimin e minareve në gjithë Zvicrën. Ajo është marrë vetëm me implikimin e ngritjes së minares në kontekst të rregullave urbane të ndërtimit.

Problemi me minaren e Qendrës Kulturore Islamike të Langenthalit është aktual prej vitesh. Fillimisht – dhe kjo ishte para referendumit që pati ndaluar minaret – si drejtoria komunale ashtu dhe ajo kantonale për ndërtim e kishin dhënë lejen për ngritjen e minares. Por ngritja e saj qe zvarritur dhe një komitet i përbërë nga kundërshtarë të minareve kishte bërë ankesa në nivele të ndryshme të gjyqësisë.

Bashkësia Islame e Langenthalit është shprehur e dëshpëruar për vendimin e gjykatës. Por ajo, sipas një komunikate të lëshuar sot, e respekton arsyetimin e vendimit gjyqësor sipas të cilit problemi nuk është te vetë minarja por te rregullat e ndërtimit.

Bartësit e iniciativës për ngritjen e minares kanë të drejtë që brenda 30 ditëve të ushtrojnë ankesë në Gjykatën Federale.