Fëmijët e migrantëve ndërprejnë shkollimin 13 herë më shpesh se vendësit

13% të fëmijëve me prejardhje të huaj nuk munden ta mbarojnë ose detyrohen ta përsërisin vitin e parë të shkollimit të mesëm ose të zanatit. Moshatarëve të tyre zviceranë kjo u ndodh vetëm në 1% të rasteve

Nxënësit me prejardhje të huaj braktisin shkollimin e mesëm ose profesional dukshëm më shpesh se moshatarët e tyre zviceranë. Siç e tregon një studim i realizuar nga Universiteti i Cyrihut dhe ai i Bernës, 13% të fëmijëve me prejardhje të huaj nuk munden ta mbarojnë ose detyrohen ta përsërisin vitin e parë të shkollimit të mesëm ose të zanatit (shkollës profesionale).

Dallimi me nxënësit zviceranë (pa prejardhje të huaj) në këtë pikë është shumë i madh. Këtyre të fundit vetëm në 1 për qind të rasteve u ndodh ta ndërprejnë ose ta përsërisin vitin shkollor, shkruan “SonntagsZeitung”.

Po ashtu studimi ka ardhur në përfundimin se fëmijët zviceranë në 69 për qind të rasteve pas përfundimit të shkollimit obligativ vazhdojnë drejtpërdrejt mësimin në një shkollë profesionale dhe e përfundojnë me sukses vitin e parë. 21 për qind të fëmijëve zviceranë detyrohen të bëjnë një vit pauzë (nuk gjejnë vend për shkollë a zanat) ndërsa te fëmijët me prejardhje të huaj kjo ndodh në 33% të rasteve, transmeton albinfo.ch. Nga ana tjetër, 53% të tyre e përfundojnë me sukses vitin e parë të shkollimit profesional ose të zanatit.

Arsyeja përse fëmijët me prejardhje të huaj kanë më pak sukses se sa vendësit në fillimin e shkollimit të tyre profesional qëndron, sipas autorëve të studimit, në informimin e mangët të prindërve të nxënësve me prejardhje të huaj.

Për migrantët që vijnë nga shtetet me sistem shkollor që ndryshon shumë nga ai i Zvicrës është e vështirë ta kuptojnë në tërësi sistemin e këtushëm arsimor, transmeton albinfo.ch. Rrjedhimisht ata nuk janë në gjendje të ndihmojnë fëmijët e tyre.

Studimi ka marrë në shqyrtim 13.000 nxënës të klasave të nënta të cilët kanë marrë pjesë në studimin e Pisa-s në vitin 2012.