Futbollisti shqiptar mes Zvicrës dhe Kosovës

Futbollistët shqiptarë gjithnjë e më shumë po depërtojnë në Evropë, duke qenë shumë të suksesshëm në skuadrat ku luajnë.

Njëri ndër ta është edhe Çendrim Kameraj nga Jashanica e Klinës, duke qenë pjesë e Juventusit për grupmoshat e reja.

Kameraj që po qëndron në Kosovë për pushime, në një intervistë për “KTV” ka folur për karrierën e tij, e cila ka nisur që në moshën 5 vjeçare.

18-vjeçari ka kontratë tri vjeçare me klubin italian derisa luan në pozitën e mesfushorit, e shpeshherë edhe te mbrojtësit të djathtë, përcjell albinfo.ch.

Futbollisti shqiptar është pjesë e grupmoshave të reja të Zvicrës, por që disa javë në adresë të tij ka shkuar edhe ftesa e Kosovës për të cilën ai thotë se, ende nuk ka vendosur.

“Do të diskutojmë me familjen. Nuk e kam menduar ende se në cilën Kombëtare do të luaj”, është shprehur futbollisti shqiptar.

Çendrim Kameraj i ka zhvilluar 16 ndeshje që prej transferimit të tij gjatë verës dhe ka shënuar edhe një gol në garat e Ligës së Kampionëve për të rinj.