St. Moritz, qendra e parë skitare që pranon pagesat me Bitcoin

Qendra e njohur e skive St. Moritz në Luginën Engadine është bërë e para në Zvicër që ka filluar të pranojë kriptovalutën Bitcoin, si pagesë për nevoja të ndryshme, shkruan ‘swissinfo.ch’.

Sipas televizionit publik zviceran, “SRF” dhe gazetës “Südostschweiz”, “Engadin St Moritz”, është kompania e parë e teleferikëve që njeh pagesat me kriptovalutë, përcjell abinfo.ch.

Drejtori i kompanisë, Markus Meili, tha për “Südostschweiz” se ai nuk ishte i shqetësuar për ndryshimet e Bitcoin-it, pavarësisht nga vlera e saj që u rrit nga 1,000 dollarë (CHF099) në fillim të vitit, mbi 17,000 dollarë më parë këtë muaj.

“Ne gjithashtu pranojmë euro, pavarësisht nga kursi i këmbimit. Duhet të jemi në hap me kohën, veçanërisht kur kemi të bëjmë me digjitalizimin”, theksoi ai.

Në Zvicër ka më pak se 200 kompani në të gjitha sektorët në Zvicër, që këtë kriptovalutë e pranojnë si monedhë në pagesa të ndryshme.

Në shtator, qyteti jugor zviceran i Chiassos njoftoi se do të pranonte Bitcoin, si pagesë për faturat e taksave deri në CHF250.