Për katër muaj, mbi 21 mijë raste të gripit në Kosovë

Instituti Kombëtar i Shëndetësisë Publike në Kosovë ka bërë të ditur se për katër muajt e fundit, janë regjistruar më shumë se 21 mijë raste të gripit sezonal.

Sipas një njoftimi nga IKSHP, situata është nën kontroll por ekziston mundësia e rritjes së rasteve për shkak të gjendjes klimatike, transmeton Albinfo.ch.

IKSHP ka njoftuar se prej 1 tetorit 2017 e deri më 21 janar 2018 janë raportuar 21350 raste të dyshimta për grip (ILI), 3036 raste ARI (Infeksion Respirator Akut) dhe 54 raste SARI (Sëmundje e Rëndë Respiratore Akute).

Më së shumti raste gripi janë regjistruar në Prishtinë, Prizren dhe Podujevë, por sipas IKSHP-së asnjëra s’e ka kaluar pragun epidemik.

Ky institut ka rekomanduar që njerëzit të mos dalin gjatë në ambient të ftohtë, të mos qëndrojnë në lokale të mbyllura me dendësi të madhe të njerëzve dhe të përdorin sa më shumë lëngje të nxehta e vitamina.