Opozita nuk voton për aeroportin e Vlorës, reagon Rama

Opozita në Shqipëri në Komisionin e Veprimtarisë Prodhuese ka votuar kundër ndërtimit të aeroportit të Vlorës, i cili do të hapë vende pune dhe do të ketë impakt në ekonomi. Kjo ka nxitur reagimin e  Kryeministri Edi Rama.

Ai ka thënë se çka ka opozita që është kundër këtij projekti. “Po me aeroportin e Vlorës, çfarë kanë që votojnë kundër? 100 milionë euro investim, 1000 të punësuar të përhershëm, super impakt ekonomik! Jo, duan çizme”, shkruan Rama.

Ndërsa ministri i Infrastrukturës dhe Energjetikës, Damian Gjiknuri, shprehet se aeroporti i Vlorës do të jetë financim privat që do të sjellë një potencial të madh zhvillimi dhe punësimi jo vetëm për Vlorën, por edhe për qytetin e Fierit.

Komisioni i Veprimtarive Prodhuese e miratoi vetëm me votat e pozitës projekt ligjin që autorizon qeverinë për të negociuar një kontratë koncesionare për ndërtimin e një aeroporti të ri ndërkombëtar në Vlorë.