SVP-UDC kërkon kampe internimi për azilantët problematikë

Azilkërkuesit me sjellje të pahijshme dhe delinkuentët në mesin e tyre duhet të vendosen në kampe qendrore internimi

Problemet që kanë ndodhur kohëve të fundit në shtëpinë e strehimit të azilkërkuesve në Hassliberg të Bernës, kanë bërë që SVP-UDC e këtij kantoni të kërkojë kampe internimi për azilkërkuesit problematikë.

Zënkat mes azilkërkuesve, vjedhjet dhe prishja e qetësisë kanë shtyrë në veprim edhe qeverinë e Zvicrës. Zyra Federale për Migracion, si përgjigje ndaj problemeve në fjalë ka zvogëluar numrin e azilkërkuesve në atë qendër, ka vendosur personel mbikëqyrës të sigurisë etj. 

Por të gjitha këto janë pak për SVP-në e regjionit.

“Siç po shihet prej kohësh, situata po përshkallëzohet në vazhdimësi. Zhvillimet aktuale në Hasliberg dhe në komunat tjera e tregojnë këtë në mënyrë shumë të dukshme. Qeveria Federale dhe parlamenti duhet që më në fund të veprojnë, për tu ofruar qytetarëve sigurinë e duhur”, citojnë mediet SVP-në.

Sipas kësaj partie, nevojiten masa më efikase në lëmin e azilit. Azilkërkuesit me sjellje të pahijshme dhe delinkuentët në mesin e tyre duhet të vendosen në kampe qendrore internimi që do të udhëhiqeshin nga federata.

Po kështu SVP-UDC kërkon që refugjatët e ndjekur penalisht “të burgosen menjëherë, tu përmbyllet procedura e azilit dhe të dëbohen me procedurë të shkurtë”.