Dënimi për biletë do të vlejë për gjithë Zvicrën dhe për të gjithë transportuesit

Aktualisht për SBB-në, Postauto Schweiz dhe ndërmarrjet tjera për transportim të udhëtarëve, funksionojnë regjistra separatë për udhëtarët në të zezë

Duke filluar nga prilli i vitit 2019, në Zvicër do të hyjë në fuqi mbajtja e një regjistri nacional për pasagjerët që kapen “në të zezë”, gjegjësisht shfrytëzojnë shërbimet e transportit publik pa biletë valide. Këtë risi e ka konfirmuar shoqëria “Direkter Verkehr Schweiz” për radion SRF.

Qëllimi i funksionalizimit të këtij regjistri është ndjekja e recidivistëve (atyre që e përsërisin veprën), transmeton albinfo.ch. Ata duhet të ndiqen në nivel vendi dhe të ndëshkohen me shuma më të larta se sa të tjerët që kanë bërë vetëm një shkelje. Emri i shënuar në regjistër si shkelës do të mbetet aty në dy vitet në vijim.

Aktualisht për SBB-në (Ndërmarrja Federale e Hekurudhave), Postauto Schweiz dhe ndërmarrjet tjera për transportim të udhëtarëve, funksionojnë regjistra separatë për udhëtarët në të zezë, përcjell albinfo.ch. Në këtë mënyrë, personat që udhëtojnë pa biletë në njërën ndërmarrje, mbetet i padënuar kur udhëton me ndërmarrjen tjetër të transportit.