Lunacek promovon librin e saj për Kosovën

Në këtë promovim rreth librit do të flasin personalitete të shquara si Wolfgang Petritsch, i dërguar i posaçëm i BE-së për Kosovën 1998-1999 dhe Vedran Dzihic, politikolog dhe ekspert u Ballkanit nga Universiteti i Vjenës

Sonte, më 14 shkurt, në prag të dhjetëvjetorit të shpalljes së Pavarësisë së Kosovës, politikania austriake Ulrike Lunacek bën promovimin e librit të saj kushtuar Kosovës “Frieden bauen, heisst weit bauen” – Von Brüssel ins Amselfeld und retour. Kosovos Weg in die EU und mein Beitrag dazu” (“Të ndërtosh paqen do të thotë të ndërtosh shumë”, me moton: Nga Brukseli deri në Fushën e mëllenjave dhe mbrapa – Rruga e Kosovës për në BE dhe kontributi im në këtë drejtim), shkruan albinfo.ch.

Në këtë promovim rreth librit do të flasin personalitete të shquara si Wolfgang Petritsch, i dërguar i posaçëm i BE-së për Kosovën 1998-1999 dhe Vedran Dzihic, politikolog dhe ekspert u Ballkanit nga Universiteti i Vjenës.

Lunacek njihet si mike e dëshmuar e Kosovës. Ajo ka qenë për disa vite me radhë raportuese për Kosovën në Parlamentin e Evropës dhe njëherësh nënkryetare e Parlamentit të Evropës.

Po ashtu ajo ka qenë kryetare e Partisë së Gjelbër të Austrisë në krye të listës së kandidatëve të partisë së  saj në zgjedhjet parlanmentare të vitit të kaluar. Pas humbjes në zgjedhjet e përmendura ajo ka dhënë dorëheqje nga të gjitha pozicionet politike. Por, siç e thotë në një deklaratë të publikuar sot në shtypi austriak, ajo vazhdon të jetë njeri politik, shkruan albinfo.ch. Në këtë kuptim Lunacek ka bërë një reagim ndaj deklaratës së nënkancelarit austriak Strache i cili kishte thënë se Kosova është pjesë e Serbisë.

Lunacek ka kërkuar reagim më të vendosur të kancelarit austriak, Sebastian Kurz ndaj deklaratës së ndihmësit të tij. Ajo ka thënë se heshtja e kancelarit rreth veprimeve të krerëve të partisë që e ka në koalicion (FPÖ) është e pakuptueshme. Strache me deklarimin e tij jo vetëm që e dezavuon politikën e jashtme austriake për Ballkanin por rrezikon edhe ushtarët austriakë që shërbejnë në Ballkan, gjegjësisht në Kosovë dhe në Bosnjë, ka theksuar Lunacek.

Promovimi fillon nga ora 18:30

Adresaa: Haus der Europäischen Union (Wipplingerstrasse 35, 1010 Wien).