Përfundojnë Lojërat Olimpike, Zvicra me 15 medalje

Zvicra ka tejkaluar edhe parashikimet duke fituar në përgjithësi 15 medalje, prej tyre pesë të arta, gjashtë të argjendta dhe katër të bronzta, dhe duke u renditur në vendin e tetë në përgjithësi në këto Lojëra

Keystone EPA/SERGEI ILNITSKY

Lojërat Olimpike Dimërore në Korenë Jugore kanë përfunduar të dielën në mesditë me ceremoninë mbyllëse, shkruan albinfo.ch.

Për dy javë sportistët kanë garuar për medalje, derisa në vendin e parë e ka përfunduar Norvegjia me 39 medalje, prej tyre 14 të arta.

Në ceremoninë mbyllëse sërish sportistët kanë dalë në skenë me flamujt e shteteve të tyre, duke përfshirë këtu edhe ata zviceranë, shqiptarë dhe të Kosovës. Për Kosovën kjo ishte hera e parë që mori pjesë në Lojërat Dimërore me Albin Tahirin, derisa Shqipërinë e përfaqësuan Erjon Tola dhe Suela Mëhilli, që nuk arritën në zonën e medaljeve.

Zvicra ka tejkaluar edhe parashikimet duke fituar në përgjithësi 15 medalje, prej tyre pesë të arta, gjashtë të argjendta dhe katër të bronzta, dhe duke u renditur në vendin e tetë në përgjithësi në këto Lojëra.

Gjermania ishte në vendin e dytë me 31 medalje, prej tyre 14 të arta, duke u pasuar nga Kanadaja, Shtetet e Bashkuara të Amerikës, Holanda, Suedia, Koreja Jugore e Zvicra.