Azilkërkuesit shqiptarë do të kthehen me forcë nga Gjermania

Gjatë një konference me temë “Sfidat e emigracionit”, ajo ka deklaruar se shqiptarët do të kthehen në forcë në vendlindje

Ambasadorja gjermane në Shqipëri, Susanne Schütz ka bërë një deklaratë të fortë në lidhje me shqiptarët që kanë ‘pushtuar’ Gjermaninë me pretendimin për të marrë azil.

Gjatë një konference me temë “Sfidat e emigracionit”, ajo ka deklaruar se shqiptarët do të kthehen në forcë në vendlindje.

Në prani edhe kryeministrit të Shqipërisë, Edi Rama, ambasadorja gjermane tha se Shqipëria tani është një vend kandidat për në BE dhe jo me persekutime politike, përcjell albinfo.ch.

“Shqipëria është një vend kandidat i BE dhe nuk është një vend me persekutim politik, që ishte një nga arsyet për të dhënë azil dhe do të kthehen në Shqipëri edhe nëse duhet me forcë dhe do të ndalohen të hyjnë në Gjermani deri në 5 vjet”, deklaroi ambasadorja gjermane.

Nga ana tjetër, ajo theksoi se shqiptarët kanë mundësi të tjera për të shkuar në Gjermani dhe për të punuar në mënyrë të ligjshme.

“Pavarësisht këtyre politikave tregu është i hapur për ata punëtorë të kualifikuar, nëse ata plotësojnë kushtet kanë mundësi të aplikojnë për viza punë dhe 3 mijë shqiptarë kanë përfituar në 2017 nga kjo”, u shpreh ndër të tjera ambasadorja gjermane.