Shaqiri, 90 minutat e parë me Bajernin

Shaqiri ka luajtur të martën ndeshjen e parë për Fc Bajernin. Skuadra bavareze ka pasur dje në plan lojën e parë testuese, kundër skuadrës së Ligës së Tretë Unterhaching, të cilën e ka fituar jo lehtë, me rezultatin minimal, 1:0.

Lojtari shqiptar ka zëvendësuar Robenin i cili si pjesëmarrës i Euro 12 ka pushime të zgjatura. Xherdani ka luajtur gjatë gjithë ndeshjes, pra 90 minuta dhe pas saj u ka deklaruar medieve gjermane dhe zvicerane se është shumë i kënaqur me ndeshjen dhe me angazhimin e tij.

Duke folur për caqet e tij në FC Bayern, Shaqiri ka thënë: “Unë mund të luaj qendrën e majtë dhe atë të djathtë. Është e rëndësishme për lojtarin që të jetë polivalent, sepse kështu fiton më shumë shanse. Unë vi nga një klub që ka fituar shumë tituj dhe dua të vazhdoj në atë drejtim”.

Lidhur me konkurrencën në Bajern, xhuxhi magjik ka thënë se është e vërtetë se ka konkurrencë por “është e rëndësishme që ne jemi gjithmonë në gatishmëri për njëri tjetrin. Për mua është mirë që të jem prej fillimit në përgatitje, por me të vërtetë “nxehtë” do të bëhet vetëm kur të inkuadrohen edhe futbollistët që kanë luajtur për kombëtaren gjermane (në Euro12).

Shaqiri ka folur edhe për trajnerin e ri, Matthias Sammer. “Me Sammerin, klubi ka bërë një zgjedhje shumë të mirë. Ka zgjedhur njënjeri që e njeh futbollin. Ai është profesionist”