Kushtetuesja arsyeton vendimin për Jahjagën

Gjykata Kushtetuese: Gjithë populli i Kosovës pret që Jahjaga do të jetë presidentja e tyre gjatë pesë vjetëve të ardhshme

Gjykata Kushtetuese e Kosovës ka dërguar një raport prej 42 faqesh, ku shpjegon dhe arsyeton vendimin e saj për mandatin 5-vjeçar të Atifete Jahjagës në krye të shtetit. Kushtetuesja hedh poshtë marrëveshjen politike për zgjedhje të reja presidenciale, duke arsyetuar se Jahjaga ka mandat 5-vjeçar.

Sipas gjykatës, të cilin e citon RTK, Jahjaga me 7 prill të vitit të kaluar ka marrë besimin e shumicës së deputetëve të Kuvendit të Kosovës për ta drejtuar shtetin në mandat pesëvjeçar. Vendimi për këtë mandat, sipas Gjykatës, i është dërguar Kryesisë së Kuvendit, Qeverisë dhe Arkivit të Kosovës.

“Mbështetur në këtë vendim, Kushtetuesja ka nxjerrë përfundimin se ndërprerja e parakohshme e mandatit të presidentes, e shkaktuar nga futja e sistemit të ri zgjedhor, pakëson të drejtat dhe liritë e përcaktuara në Kapitullin II të Kushtetutës”, thuhet në vendim të gjykatës.

Kjo e fundit thotë se “gjithë populli i Kosovës pret që ajo të jetë presidentja e tyre gjatë pesë vjetëve të ardhshme”.

Atifete Jahjaga, një ish-eprore e policisë së Kosovës erdhi në krye të shtetit pas një marrëveshje politike ndërmjet Hashim Thaçit, Isa Mustafës dhe Behgjet Pacollit në prill të vitit të kaluar. Ajo ishte e preferuara e ambasadorit amerikan Chrisopher Dell, ndërsa sipas marrëveshjes, ajo do të ushtronte detyrën e presidentit deri në zgjedhjet e jashtëzakonshme që të pasonin pas ndryshimeve kushtuese.

Ndryshimet në Kushtetutë parashikojnë edhe zgjedhje të jashtëzakonshme dhe të drejtpërdrejta për president. Isa Mustafa i LDK-së, ndërkaq ka kërcënuar se nëse Jahjaga vazhdon mandatin e saj, ai nuk do t’i votojë ndryshimet kushtuese. Këto të fundit përcaktojnë edhe fundin e mbikëqyrjes së pavarësisë nga ana e ICO-së.