Në Kosovë edhe një bankë turke

Zyrtarët e Bankës Qendrore të Kosovës kanë konfirmuar se janë duke shqyrtuar aplikacionin e njërës prej bankave të mëdha nga Turqia, për investim në Kosovë. Nëse kjo lejohet, atëherë do të shkojë në tre numri i institucioneve financiare me kapital të biznesmenëve nga ky vend, pas Bankës Kombëtare Tregtare dhe TEB Bankës

Siç raporton gazeta “Express”, Banka Kombëtare Tregtare dhe TEB Banka kontrollojnë rreth 7 për qind të tregut bankar në Kosovë.

Mësohet se në takim me Guvernatorin Gani Gërguri ata kanë shprehur interesim për të zgjeruar veprimatinë e tyre edhe në Kosovë, pasi që vlerësojnë se ekziston stabilitet i mjaftueshëm financiar dhe disiplinë fiskale. Edhe zëdhënësi i BQK-së, Besnik Kada ka pranuar se tashmë kjo bankë i ka kryer procedurat e aplikimit për të operuar në Kosovë.

“ Aplikacioni i një banke nga Turqia është në proces e sipër të shqyrtimit. Për hir të respektimit të integritetit të procesit të licencimit emri i bankës bëhet publik vetëm me rastin e marrjes apo refuzimit të licencës. Mirëpo, me rëndësi është se fjala është për një nga bankat e mëdha nga Turqia”, ka pohuar Kada për “express”.

Ndryshe kompanitë turke janë me aktivet në investime në Kosovës. Ato kanë investuar në procesin e privatizimit në Aeroportin e Prishtinës në KEK, ndërsa ka pretendime se do të investojnë edhe në privatizimin e Postës. Gjithashtu është konzorsiumi turko-amerikan “Bektel-Enka” që është duke e ndërtuar autostradën “Dr, Ibrahim Rugova”.