Vetëvritet pasi plagos partneren

Edhe përkundër plagosjes, zviceranja ka arritur të largohet me veturë disa qindra metra, prej nga e ka alarmuar Policinë Kantonale të St. Gallenit

Mëngjesin e së mërkurës, në Gossau SG të Zvicrës ka ndodhur një tragjei e rëndë: Një zviceran 52-vjeçar ka shtënë mbi partneren e tij duke e plagosur në kokë. Më pas ajo ka arritur të largohet, ndërsa ai ka bërë vetëvrasje.

Pak pas orës 09.30 në rrugën “Schwalbenstrasse” janë dëgjuar të shtëna me armë. Policia në vendngjarje ka gjetur një zviceran të vrarë 52-vjeçar. Pas një kohe të shkurtër, në stacionin policor është lajmëruar një zvicerane e plagosur 42-vjeçare. Ajo ka deklaruar se është plagosur nga partneri i saj i jetës.

Sipas hetimeve të “Blick” bëhet fjalë për një çift zviceran që kanë pasur probleme të ndarjes, përcjell Albinfo.ch.

Edhe përkundër plagosjes, zviceranja ka arritur të largohet me veturë disa qindra metra, prej nga e ka alarmuar Policinë Kantonale të St. Gallenit. Tashmë ajo është lëshuar nga spitali, pasi ka pësuar vetëm plagë sipërfaqësore. Hetimet e mëtutjeshme janë në rrjedhë e sipër.