Zbutje e Roamingut për shtetasit e BE-së në raport me Ballkanin Perëndimor

Komisioni i BE-së ka përshëndetur hapat e ndërmarrë nga operatorët telefonikë për uljen e çmimeve që pritet të jetësohen jo më larg se këtë verë

Ndërkohë që telefonimi dhe shfrytëzimi i internetit në mes banorëve të shteteve anëtare të BE-së ka kohë që është liruar nga roamingu, gjegjësisht bëhet me çmime vendore, kjo gjë nuk vlen kur këta banorë duan të komunikojnë me shtetet joanëtare të BE-së.

Kështu, kur bullgarët duan të telefonojnë në Serbi, duhet të paguajnë deri në 3 euro minutin, shkruan focus.de. Ose, duhej të paguanin deri në vendimin e fundit që u mor në Samitin e mbajtur në Sofje. Në këtë samit u vendos që çmimet e roamingut në regjion të reduktohen, transmeton albinfo.ch. Kjo pritet të mundësohet nga një proces i iniciuar nga Komisioni i BE-së.

Komisioni i BE-së ka përshëndetur hapat e ndërmarrë nga operatorët telefonikë për uljen e çmimeve që pritet të jetësohen jo më larg se këtë verë.

Si bazë për këtë zhvillim shërben një marrëveshje e bërë për një program digjital për regjionin e Ballkanit Perëndimor, përcjell albinfo.ch. Dokumenti është nënshkruar nga gjashtë shtetet e Ballkanit Perëndimor që morën pjesë në samit: Kosova, Shqipëria, Maqedonia, Serbia, Mali i Zi dhe Bosnjë e Hercegovina.

Nga ana tjetër, roamingu sa i përket telefonimit nga vendet e Ballkanit në drejtim të vendeve të BE-së, mbetet ashtu sikur ka qenë deri tash.