Zviceranët, shumë të kënaqur me sistemin e tyre politik

Në planifikimet afatgjata, në Zvicër bëhet përpjekje që të sigurohet një miratim sa më i gjerë nga populli votues

Plot 67 për qind të zviceranëve duken të kënaqur me sistemin politik të vendit të tyre. Ndryshe nga zviceranët, fqinjtë e tyre, gjermanët dhe austriakët janë shprehur dukshëm më të pakënaqur me sistemin politik të vendeve përkatëse.

Këtë e ka konstatuar një sondazh i porositur nga magazina “Reader`s Digest”, njofton 20 Minuten.ch . Sipas sondazhit, vetëm 29 për qind të gjermanëve dhe 34 për qind e austriakëve shprehen të kënaqur me sistemin e tyre politik.

Sipas shpjegimit që bën sociologu gjerman nga universiteti i Bielefeldit Stefan Liebig, rezultati i tillë i Zvicrës është lehtë i shpjegueshëm. Në Zvicër populli është shumë më tepër i përfshirë në zgjedhjen e çështjeve të caktuara. Në planifikimet afatgjata, në Zvicër bëhet përpjekje që të sigurohet një miratim sa më i gjerë nga populli votues”.

Në sondazhin e bërë në Zvicër është angazhuar instituti për hulumtimin e tregut Demoscope, i cili ka anketuar 1008 persona, ndërsa në Gjermani dhe Austri ka qenë instituti për hulumtimin e opinionit Emnid që ka kryer sondazhin e njëjtë.

Sipas 41 % të zviceranëve të anketuar, do të ishte më mirë që qytetarët të kenë edhe më shumë qasje në vendimet politike. Ndërkohë, të pakënaqur me nivelin e pjesëmarrjes së qytetarëve në vendimet politike janë 73 për qind të gjermanëve dhe 56% të austriakëve të anketuar.