Mungojnë mjekët për përcjelljen e të dëbuarve me dhunë

Zyra Federale për Migracion planifikonte që një ofertues i jashtëm të fillonte nga 1 janari punën në përcjelljen e fluturimeve speciale me persona që riatdhesohen dhunshëm

Zyra Federale për Migracion (BFM) në muajin gusht të vitit që shkoi pati bërë një shpallje për shërbimin mjekësor për mbikëqyrjen e personave që dëbohen me detyrim nga Zvicra. Zyra në fjalë planifikonte që një ofertues i jashtëm do të fillonte nga 1 janari 2013 punën në përcjelljen e fluturimeve speciale me persona që riatdhesohen dhunshëm. Por, pak para përfundimit te vitit, BFM e ka anuluar konkursin.

Asnjë nga ofertat e ardhura nuk i plotëson kriteret e shpallura.

Disa ofertues i kanë porositur dokumentet për konkurrim por ka qenë vetëm një firmë e cila edhe konkretisht ka konkurruar. Është fjala për firmën Oseara, bën të ditur për mediet zvicerane zëdhënësi i BFM Micael Glauser. Kjo firmë që nga prilli i vitit 20112 është duke e realizuar mbikëqyrjen e fluturimeve në fjalë, në kuadër të një pilot projekti. Aktualisht, deri në konkursin e ri, BFM do të vazhdojë edhe për gjashtë muaj kontratën me këtë firmë.

Duke filluar nga marsi i vitit 2010 fluturimet speciale me të huaj që riatdhesohen nga Zvicra, përcillen veç me policë edhe me personel mjekësor. Kjo praktikë është vendosur pas një rasti tragjik, kur një azilkërkues nigerian kishte vdekur në përpjekje për ta dëbuar, të lidhur me pranga në gjithë trupin.