Fëmijët e migrantëve jetojnë më pak!

Këtë e thotë një studim i realizuar nga instituti për mjekësi sociale dhe preventive i Universitetit të Cyrihut, duke marrë si shembull italianët

Italianët që kanë emigruar në Zvicër jetojnë më gjatë se sa vendësit. Shkenca e arsyeton këtë me faktin se zakonisht ata që emigrojnë janë personat më të shëndetshëm dhe më të guximshëm.

Por, siç e shpjegon një studim i realizuar nga instituti për mjekësi sociale dhe preventive i Universitetit të Cyrihut, fëmijët e këtyre emigrantëve kanë jetë mesatare më të shkurtë se zviceranët.  Rreziku për vdekje te italianët e ardhur në Zvicër është mesatarisht 10 për qind m ë i vogël se te zviceranët. Dallimi është më i madh në moshën 40-55 vjeçare ndërsa në moshë më të shtyrë dallimet zvogëlohen.

Por, te pasardhësit e këtyre emigrantëve të gjeneratës së parë, ndodhë pikërisht e kundërta: shtohet rreziku për vdekje të hershme. Kjo ndodh për faktin se ata, ndryshe nga prindërit e tyre, largohen nga ushqimi tradicional mediteran, i pasur me peshk, pemë, perime dhe vaj ulliri.

Por edhe për një fakt tjetër interesant: këtij brezi, në moshën e fëmijërisë atyre u mungon rrethi familjar që prindërit e kanë braktisur kur kanë emigruar. 

Për këto arsye, sipas studimit, italianët e lindur në Zvicër kanë një rrezikshmëri prej 16 për qind më të madhe të vdekjes se sa vendësit. Po ashtu këtë shtim rrezikshmërie e shkaktojnë edhe shanset më të këqija për arsimim. Vajzat janë më pak të goditura nga ky rrezik se sa djemtë, është konstatuar veç tjerash në këtë studim