Bajramaj po shërohet me sukses

Synim imi është që të jem e gatshme për Kampionatin Evropian që mbahet në qershor në Suedi dhe shanset janë të mira”, ka thënë Lira

Fatmire Bajramaj është në rrugë të mirë për t`u shëruar nga lëndimi i rëndë i këmbës që pati pësuar në muajin shtator  të vitit të kaluar. Siç ka treguar për mediet gjermane, futbollistja më e njohur e Gjermanisë, Fatmire (Lira) Bajramaj është duke ushtruar intensivisht për t`iu kthyer formës që e kërkon futbolli në ligën e parë të Gjermanisë.

Ajo po bën ushtrime rehabilituese, nga e hëna deri të shtunën, çdo ditë nga shtatë orë ndërsa ka filluar edhe të vrapojë. Po ashtu ka filluar të ushtrojë kalimet dhe hedhjen e topave. Prognozat e mjekëve për Fatmiren janë shumë optimiste.

“Synim imi është që të jem e gatshme për Kampionatin Evropian që mbahet në qershor në Suedi dhe shanset janë të mira”, ka thënë Lira.

Fatmirja luan duke filluar nga viti 2011 për skuadrën Frankfurt të bundesligës së parë gjermane.  Sukseset e saj të deritashme në arenën ndërkombëtare kanë qenë, ndër të tjra; në vitin 2007 ajo me përfaqësuesen e parë gjermane doli kampione në Kampionatin Botëror të Futbollit për femra. Në vitin 2008 në Lojërat Olimpike fitoi medaljen e bronztë ndërsa në vitin 2009 edhe një herë bëhet kampione evropiane. Në vitin 2011 ajo është shpallur futbolliste e vitit në Gjermani.

Në foton më lartë ajo shihet në mesin e adhurueseve të saj dhe një sponsori të klubit të Frankfurtit, gjatë vizitës që i ka bërë ndërmarrjes së tij.