Studentët shqiptarë priten në Konsullatën e Kosovës në Cyrih

Ishte një takim orientues në të cilin të dyja palët u zotuan për bashkëpunim në zhvillimin e kapaciteteve për të kultivuar arsimimin dhe kulturën kombëtare

Në kuadrin e angazhimit të saj për thellimin e bashkëpunimit me komunitetin e këtushëm shqiptar Konsullata e Republikës së Kosovës në Cyrih, ka zhvilluar një takim me studentët e këtushëm shqiptarë.

“Në rrjedhën e aktivitetit të vazhdueshëm dhe përkushtimit të Konsullatës së Republikës së Kosovës në Cyrih për mbrojtjen dhe promovimin e interesave kombëtare, më 20.03.2013 në hapësirat e veta konsullata organizoi një takim me studentët shqiptarë që studiojnë në Universitetin e Cyrihut”, thuhet në një njoftim të konsullatës.

Siç bëhet e ditur më tutje në njoftim, studentët u pritën nga Konsulli Salih Sefa, si dhe Zv.Konsullja Ajmane Veseli. Ishte një takim orientues në të cilin konsullata shprehu gatishmërinë e saj për të mbështetur çdo ide, plan apo iniciativë konkrete të studentëve shqiptarë në zhvillimin e kapaciteteve për të kultivuar arsimimin dhe kulturën kombëtare.

Gjithashtu, edhe studentët paraqitën ide konkrete në këtë aspekt. Ata shprehën gjithë gatishmërinë e tyre për asistencë dhe deklaruan se do të jenë pjesë aktive e çdo procesi me interes kombëtar.

Të dy palët ranë dakord që ky ishte takim i parë i kësaj natyre dhe se këto takime e diskutime do të vazhdojnë rregullisht deri në arritjen e rezultateve konkrete, përfundon njoftimi i Konsullatës së Kosovës në Cyrih.