OKB, ultimatum Gjermanisë për tezat raciste të Sarrazin-it

Sarrazin kishte folur me përçmim edhe për shqiptarët, duke i vendosur në kontekstin e “mbipopullimit të Gjermanisë nga të huajt e pacivilizuar”.

Komisioni  kundër racizmit në kuadër të OKB-së ka gjetur se mosndjekja penale e ish politikanit Thilo Sarrazin për tezat e tij raciste të paraqitura publikisht paraqet shkelje të konventës së OKB-së për eliminimin e çdo forme të diskriminimit në bazë race.

Sarrazin, i cili ka qenë politikan i nivelit të lartë i SPD-së dhe ekspert financash që ka mbajtur edhe poste menaxheriale të larta në Deutsche Bank e Deutsche Bahn, disa vite më parë pati dalë në opinion me disa teza për “uljen e nivelit të inteligjencës të popullit të Gjermanisë si pasojë e numrit të madh të të huajve nga kulturat e largëta për Gjermaninë”, si turqit, arabët, ballkanasit etj.

Sarrazin kishte folur me përçmim edhe për shqiptarët, të cilët, sipas tij, kanë ndjekur serbët, dhe këtë e kishte vendosur në kontekstin e “mbipopullimit të Gjermanisë nga të huajt e pacivilizuar”.

Sipas komisionit të përmendur të OKB-së, Gjermania ka neglizhuar detyrimet e saj kundrejt bashkësisë ndërkombëtare kur tezat e Sarrazinit i ka toleruar si “shprehje të lira mendimesh”. Komisioni madje ka shkuar edhe një hap më tutje. Ai i ka dhënë Gjermanisë një afat prej 90 ditësh për të trajtuar këtë problematikë. “Nuk mjafton që racizmin ta shpallim ilegal në letër. Shteti është i detyruar që të mbrojë njerëzit nga ndërsimet raciste”, thuhet në qëndrimin e komisionit.