Zvicra kufizon ardhjen e shtetasve të BE-së

"Klauzola Ventil" lejon kontingjentet si vijon: për shtetasit e EU-8 (anëtaret e reja të BE-së) 2180 leje qëndrimi (B) ndërsa për shtetasit e EU-17, (të anëtareve të vjetra) 53700 sish

Këshilli Federal ka dalë sot pasdite me vendimin për futjen në fuqi të “Klauzolës Ventil”, përmes të cilës kufizohet migrimi i shtetasve të vendeve “të vjetra” (EU-17) të BE-së në Zvicër. Klauzola ndaj vendeve të përmendura do të aktivizohet duke filluar nga fundi i majit, posa të plotësohen kushtet për këtë. Ndërkaq, kur është fjala për vendet e reja të BE-së (EU-8) do të vazhdohet kufizimi për personat me leje qëndrimi B që vlejnë pesë vite. Mirëpo, qeveria heq dorë nga kufizimi për personat me leje të shkurtër qëndrimi L.

Për një vit do të vlejnë kontingjentet si vijon: për vizat B, (të shtetasve të EU-8) do të lëshohen 2180 leje qëndrimi ndërsa për shtetasit e EU-17 do të lejohen 53700 viza B.

Qeveria Federale ka ardhur në përfundimin se Klauzola Ventil si njëra ndër shumë masat tjera do të kontribuojë për të dizajnuar migracionin që ai të bëhet i përballueshëm për shoqërinë dhe ekonominë e Zvicrës, thuhet në komunikatën e lëshuar të mërkurën. Por qeveria është e vetëdijshme se kjo klauzolë ka veprim të kufizuar në kohë ndërsa nevojiten masa tjera për zgjidhjen e problemit.

Klauzola Ventil e përshkruar edhe në marrëveshjen për qarkullim të lirë, e autorizon Zvicrën që  të veprojë në rastet kur përqindja e lejeve të qëndrimit që janë ndarë kalojnë 10 përqindëshin e mesatares së tri viteve të fundit.

Klauzola e miratuar sot, ka ngjallur shumë kundërshtime gjatë debateve të zhvilluara rreth saj. Përveç forcave të majta politike, kundër saj janë shprehur edhe përfaqësuesit e ekonomisë.