Calmy Rey, pro zgjedhjes së qeverisë nga populli

“Zgjedhja nga populli është pozitive për barazpeshën në mes të parlamentit dhe qeverisë. Aktualisht kjo barazpeshë eshtë e çrregulluar"

Partia e saj (SP/PS) ashtu sikurse edhe të gjitha përveç SVP-së, ka kundërshtuar zgjedhjen e ekzekutivit të vendit  me votën direkte të popullit. Por ish ministrja e jashtme, Micheline Calmy Rey me këtë rast nuk e respekton disiplinën partiake dhe dëshmon se di edhe të “notojë kundër rrjedhës”.

Ajo e konsideron ide të mirë zgjedhjen e Këshillit Federal në mënyrë direkte dhe jo nga parlamenti.

Në  një intervistë për  gazetën “Schweiz am Sonntag” Calmy Rey ka thënë se “zgjedhja nga populli është pozitive për barazpeshën në mes të parlamentit dhe qeverisë. Aktualisht kjo barazpeshë eshtë e çrregulluar. Parlamenti ka së tepërmi peshë përballë qeverisë. Nga periudha kur kam qenë në qeverinë e kantonit të Gjenevës e kam mësuar se qeveria gëzon legjitimitet më të madh kur ajo zgjidhet drejtpërdrejtë nga populli”.

Rey thotë se është e dëshirueshme që qeveria të ketë më shumë mundësi për të zhvilluar vizionet e saj. “Qeverisë do t`i bënte mirë po të kishte pak më tepër kompetencë drejtimi”.  Ajo nuk ka frikë nga ndikimi i mundshëm i financuesve të fuqishëm që do të gjenin shprehje në rast të zgjedhjeve të tilla. “Ndikimi i financuesve mund të kufizohet  nëse përpilohen ligje efektive mbi financimin e fushatave të votimit dhe të zgjedhjeve. Mundësinë për një gjë të tillë do ta kishin parlamenti dhe qeveria”, ka thënë Micheline Calmy Rey.

Ndryshe nga  ajo kanë vendosur tashmë dhjetë kolegë të Calmy Rey, gjegjësisht ish ministra në Këshillin Federal.  Samuel Schmid, Pascal Couchepin, Elisabeth Kopp, Rudolf Friedrich, Kaspar Villiger, Hans-Rudolf Merz, Arnold Koller, Ruth Metzler, Flavio Cotti dhe Joseph Deiss janë bërë pjesë e komitetit kundër zgjedhjes direkte të qeverisë. Ata kanë vendosur të jenë aktivë në fushatë, duke marrë pjesë në aktivitete publike, video dhe duke u paraqitur në plakate