Bëhen me shtetësi për t’iu bashkuar kuqezinjve

Amir Abrashi, Jurgen Gjasula, Vullnet Basha, Azdren Llullaku e Ilir Berisha kanë marrë shtetësinë shqiptare

Dekreti tashmë është nënshkruar nga Presidenti i Republikës së Shqipërisë, Bujar Nishani. Në një intervistë për “Panorama Sport” njëri prej tyre është shprehur lumtur që ka veshur fanellën e Kombëtares.

Është fjala për 27 vjeçarin nga Tirana, Jurgen Gjasula, i cili  prej vitesh jeton në Gjermani, derisa aktivizohet në Bundesliga 2 me skuadrën e Duisburgut.

“Shkëlqyer, ndjehem shumë mirë. Është vendi im, çka më bën të lumtur. Dy ditë kam që stërvitem me Kombëtaren dhe jam shumë i lumtur që ndodhem këtu. Shpresoj që ta justifikoj veten dhe të jap maksimumin për këtë fanellë”. ka thënë ai.

Ish mesfushori i Baselit, St. Gallenit dhe Frankfurtit tregon edhe për arsyet që e kanë mbajtur larg Kombëtares deri më tani.

“Më vjen keq për këtë gjë. Nëse do të kisha mundësi të kthehesha në kohë, patjetër që do të bëja ndryshe. Ajo që ka ndodhur, ka kaluar tashmë dhe unë duhet të shoh përpara. Unë, jo se nuk kam pasur qejf të luaja, por kam pasur probleme edhe me pasaportën. E rëndësishme për mua është që unë jam në Kombëtare dhe shpresoj të bëj më të mirën e mundshme”, theksoi Gjasula.

Përveç Gjasulës, ekipit kuqezi me 7 qershor pritet t’i bashkohen edhe katër emra të rijnë; Ergys Kaçe (PAOK), Azdren Llulaku (Gaz Metan) dhe Ilir Berisha (Orebro), Vullnet Basha (Sion) dhe Amir Abrashi (Grasshoppers).

Mësohet se, Gjasula, Abrashi e  Basha do të kenë mundësinë të luajnë me kombëtaren shqiptare vetëm pasi të kenë marrë lejen e FIFA-s. Të pestë këta lojtarë pritet t‘i bashkohen kombëtares kuqezi në përballjen me Norvegjinë, 7 qershor, në Qemal Stafa, një ndeshje kualifikuese për botërorin, „Brazili 2014“.