Haziri çmon lart investimet nga diaspora e Zvicrës në Kosovë

Kryetari i Komunës së Gjilanit, Lutfi Haziri, gjatë vizitës në “Swiss Clinique”, ka deklaruar se shumë shpejtë regjioni i Gjilanit, ku përfshihet edhe Lugina e Preshevës, do ta ketë njërën nga klinikat më të avancuara në Kosovë.

“Vizitova njërin prej investitorëve më të mëdhenj që vjen prej Zvicrës tashmë me shërbimin në shëndetësi me klinikën e specializuar ‘Swiss Clinique’, nga pronari i kompanisë Kastro, e që është investitor i dalluar në komunën tonë”, është shprehur Haziri, shkruan albinfo.ch.

“Është njëra prej shërbimeve shëndetësore më të mëdha që regjioni i Gjilani do ta ketë, ku përfshihet edhe Kumanova, Presheva e Bujanoci. Shërbimi, mjekët, specializantët dhe përkujdesja, do ta lehtësoj jashtëzakonisht shumë këtë shërbim. Pres me padurim inaugurimin dhe besojmë shumë që ky investim do të jetë krenaria e Gjilanit”, është shprehur tutje kryetari i Gjilanit, njofton faqja zyrtare e Komunës së Gjilanit.

Pronari i kompanisë Kastro, njëherësh edhe i Swiss Clinique, Bari Kastrati, ka falënderuar kryetarin Haziri për vizitën, përkujdesjen dhe gatishmërinë e bashkëpunimit me këtë kompani.