Fischer garanton mbështetje për Kosovën

Këtë mbështetje Fischer ia ka konfirmuar homologes kosovare, presidentes Atifete Jahjaga, e cila po qëndron në vizitë shtetërore në Austri

Presidenti i Austrisë, Heinz Fischer ka rikonfirmuar mbështetje të plotë për Republikën e Kosovës në të gjitha proceset nëpër të cilat po kalon shteti më i ri i Evropës, ndërsa ka përshëndetur marrëveshjen e arritur në Bruksel për normalizimin e marrëdhënieve ndërmjet Kosovës dhe Serbisë.

Këtë mbështetje numri një i shtetit austriak ia ka konfirmuar homologes kosovare, presidentes Atifete Jahjaga. Kjo e fundit po qëndron në vizitë shtetërore në Republikën e Austrisë, me ftesë të presidentit Fischer.

Jahjaga u prit me ceremonitë më të larta shtetërore dhe pati takime me presidentin Fischer dhe me kryetaren e Parlamentit të Republikës së Austrisë, Barbara Prammer.

Gjatë takimeve u bisedua për zhvillimin dhe avancimin e marrëdhënieve ndërmjet Republikës së Kosovës dhe Republikës së Austrisë, për zhvillimet në rajon, si dhe theks i veçantë iu kushtua agjendës së integrimeve evropiane për Republikën e Kosovës.

Presidentja Jahjaga mbajti një konferencë për media, ku theksoi rëndësinë e mbështetjes së Austrisë për forcimin e subjektivitetit ndërkombëtar të Kosovës, për avancimin e proceseve demokratike në vend si dhe politikave për sundimin e rendit dhe të ligjit.

“Theksuam se është shumë i nevojshëm anëtarësimi i Kosovës në të gjitha forumet, nismat dhe organizatat rajonale dhe ndërkombëtare, se vetëm kështu vendi ynë mund të japë kontributin e pritur në avancimin e të gjitha proceseve rajonale dhe globale”, tha presidentja Jahjaga .

Ajo tha se Republika e Kosovës tashmë është një realitet i pranuar, është një faktor paqeje dhe stabiliteti, është një vend demokratik i ndërtuar në parimin qytetar, në të cilin respektohen liritë dhe të drejtat e të gjithë njerëzve dhe në të cilin të gjithë qytetarët, pa marrë parasysh përkatësinë etnike, fetare etj.

“E sigurova Presidentin Fischer se e ardhmja e Republikës së Kosovës është në zhvillimin e proceseve demokratike në stabilitetin ekonomik dhe politik dhe se anëtarësimi i Kosovës në Bashkimin Evropian, ashtu si edhe të gjitha vendeve të Ballkanit Perëndimor, është e vetmja alternativë”, tha ajo. 

Sipas saj, në këtë rrugë të gjitha vendet i përmbushin detyrat e shtëpisë vetëm duke zhvilluar marrëdhënie të mira fqinjësore dhe duke i ndihmuar njëra-tjetrës.

“Ne theksuam se anëtarësimi i Kroacisë në Bashkimin Evropian është një sukses i popullit dhe i shtetit kroat, por edhe një sukses i politikës së zgjerimit të BE dhe kjo është një nxitje për të gjitha vendet e rajonit  që aspirojnë të anëtarësohen në Bashkimin Evropian”, deklaroi presidentja kosovare.

Ajo gjatë ditës është takuar edhe me kryetaren e Parlamentit të Republikës së Austrisë, Barbara Prammer.