Meshkujt gjejnë më lehtë zanat se femrat

Shanset më të këqija i kanë gjithsesi femrat me sukses të dobët në mësim dhe me prejardhje të huaj

Meshkujt zviceranë e kane më lehtë të gjejnë vend për tu regjistruar në shkollën e mesme profesionale (të zanatit), pas përfundimit të shkollimit fillor se sa femrat zvicerane dhe të huajt e të dy gjinive. Po kjo vlen edhe për regjistrimin e një shkolle të mesme tjetër. Krahas faktorëve individualë rol luajnë këtu edhe modeli i shkollës dhe kuota e maturitetit, shkuan nzz.ch.

Nëntë nga dhjetë meshkuj të rinj zviceranë gjejnë menjëherë pas mbarimit të shkollimit obligativ një vend për të mbaruar zanatin ose në një shkollë të mesme. Ndërsa femrat zvicerane këtë e arrijnë në masën 75 për qind, thuhet në studimin e prezantuar të premten nga x-ch.

Autori i studimit, Florian Keller ka sqaruar se femrat e kanë më vështirë të gjejnë vend për të mësuar profesionin për shkakun se oferta në profesionet tipike femërore si në shëndetësi është më e vogël.

Krahas gjinisë, një rol në këtë fushe e luan suksesi në shkollë dhe prejardhja e huaj e kandidatëve. Shanset më të këqija i kanë gjithsesi femrat me sukses të dobët në mësim dhe me prejardhje të huaj. Vetëm çdo e dyta prej tyre ka sukses të gjejë vend për të mësuar zanatin menjëherë pas shkollës fillore.