Paguhen tre fish nën pagën minimale

Punëtorët hungarezë janë paguar nga 7.96 euro ndërkohë që ora minimale e punës për punën me gjips duhet të paguhet 32.29 franga bruto

Në Winterthur është zbuluar një rast ekstrem i dumpingut të pagave. Tre hungareze, punëtorë me gjips kanë marrë nga punëdhënësi i tyre zviceran vetëm një të tretën e pagës minimale të përcaktuar me ligj në Zvicër. Punëtori Balazs Laksz ka punuar për firmën nga Winterthuri Filber GmbH në vendndërtime të ndryshme në Bazel. Pronari i firmës, Tamas Berki i kishte premtuar Laksz-it dhe bashkatdhetarëve të tij Zoltan Kosa e Ferenc Lörinc pagesën prej 20 frangash në orë.

Por Laksz i cili nga 18 prilli deri në 17 qershor (dy muaj) i kishte bërë 445 orë pune, ishte paguar vetëm 3544 franga gjithsej. Kjo i bie që ora e tij e punës është paguar vetëm 7 franga e 96 rapë neto, siç ka konstatuar sindikata Unia e cila e ka zbuluar rastin.

“Bashkëkryetari i Unia-s për Zvicrën veriperëndimore Hansueli Scheideger thotë se kjo gjendje nuk mund të vazhdohet. Sipas marrëveshjes kolektive, ora minimale e punës për punën me gjips duhet të paguhet 32.29 franga bruto. Marrë në tërësi, punëdhënësi ua ka zhvatur tre punëtorëve rreth 50 mijë franga, shkruan 20min.ch.

Rasti i keqtrajtimit është zbuluar kur punëtori Zoltan Kosa kishte pasur një aksident në punë dhe punëdhënësi nuk kishte pranuar t`i siguronte përkujdesjen mjekësore. “Pije një raki”, i kishte rekomanduar ai punëtorit. Kur punëtori ka kundërshtuar duke përmendur se do të kërkonte ndihmën e sindikatës, punëdhënësi e ka pushuar atë nga puna.