Kritika përdorimit të mjeteve qetësuese për dëbimin e të huajve

Në katër raste është dëshmuar se autoritetet kanë përdorur mjete qetësimi kundër vullnetit të personave që do të dëboheshin nga Zvicra.

Komisioni nacional për mbrojtje kundër torturimit ka drejtuar kritika në lidhje me përdorimin e medikamenteve qetësuese për të huajt që dëbohen me dhunë, në aeroplanët specialë.

Sipas këtij komisioni, në katër raste është dëshmuar se autoritetet kanë përdorur mjete qetësimi kundër vullnetit të personave që do të dëboheshin nga Zvicra.

Komisioni më tutje në reagimin e vet shkruan se mjetet për qetësim mund të përdoren vetëm në rastet kur këtë e përcakton mjeku. Dhe raste të tilla janë ato kur personi kërcënohet nga ndonjë dëmtim serioz i shëndetit ose mund të rrezikojë personat e tretë.

Si “veçanërisht shqetësues” komisioni ka vlerësuar përdorimin e medikamentit Ketamin, i cili për shkak të narkotizimit komplet të trupit përbën një ndërhyrje joproporcionale në integritetin trupor, shkruan nzz.ch.

Komisioni kundër torturës, nga korriku i vitit të kaluar deri në prill të këtij viti ka përcjellë 31 fluturime me 159 persona të dëbuar.

Si pozitive, komisioni i ka vlerësuar përdorimin e masave detyruese, prangave, të cilat që nga mesi i vitit 2012 përdoren ne mënyrë të diferencuar.

Sipas tij, autoritetet përgjegjëse kanë provuar më shpesh se më parë që situatat e vështira t`i zgjidhin me biseda qetësuese.