Produktet kosovare me cilësi evropiane

Kompania prodhuese dhe përpunuese e patates “Pestova” në Vushtrri ka marrë çmimin për arritje në kualitet “ESQR’S 2013”, nga Shoqata Evropiane për Hulumtimin e Cilësisë

Kualiteti i produkteve bujqësore në Kosovë i plotëson të gjitha kriteret e përcaktuara nga Bashkimi Evropian, prandaj për prodhimet cilësore kompanitë kosovare kanë marrë edhe çmime ndërkombëtare. Njëra nga to është Kompania prodhuese dhe përpunuese e patates “Pestova” në Vushtrri.

Kjo e fundit para një jave ka marrë çmimin për arritje në kualitet “ESQR’S 2013”, nga Shoqata Evropiane për Hulumtimin e Cilësisë.

Ministri i Bujqësisë, Blerand Stavileci tha se ndarja e këtyre çmimeve për agrobizneset kosovare, rikonfirmon kualitetin e prodhimeve bujqësore kosovare. Këto suksese, siç tha ai, janë edhe një motivim për të punuar dhe për t’i përkrahur edhe më shumë kompanitë prodhuese.

Stavileci tregoi se Ministria e Bujqësisë, nga viti në vit, përmes politikave të saj bujqësore po mundohet që ta përkrah prodhimtarinë primare dhe që nga ky vit edhe agropërpunimin.

“Ministria e Bujqësisë po ofron përkrahje për herë të parë sivjet edhe në këtë sferë të prodhimit dhe përpunimit, me të cilën merret edhe kompania “Pestova”, por edhe kompanitë e tjera. Nëpërmjet granteve investive do ta përkrahim prodhimin dhe përpunimin në masën prej 60 për qind, ndërsa pjesa tjetër e financimit do të jetë nga fondet private të agrobizneseve”, ka thënë ministri Stavileci.

Ai tregoi se tashmë janë në fazën e përzgjedhjes së projekteve dhe që nga muaji tetor do të fillojë edhe faza e investimeve, e pas kësaj ajo e ekzekutimit të përkrahjes financiare.

Në anën tjetër, ministrja e Tregtisë dhe Industrisë, Mimoza Kusari – Lila, ka thënë se këto çmime janë edhe një promovim më tepër për produktet kosovare, të cilat sipas saj kanë depërtuar edhe në tregjet më të zhvilluara të botës.

“Jemi në fazën kur institucionet e Kosovës në vazhdimësi janë në gjetje të mënyrës së përkrahjes së produkteve vendore dhe gjatë kësaj faze ne dëshirojmë të fokusohemi në përmirësimin e kualitetit të këtyre produkteve, në përmirësimin e imazhit të bizneseve tona”, tha ministrja Kusari-Lila.

Ndërsa, sipas Bedri Kosumit, pronar i kompanisë “Pestova”, ky çmim tregon se agrobizneset në Kosovë prodhojnë  produkte kualitative dhe sipas tij kualiteti i tyre po njihet edhe ndërkombëtarisht.

“Tash bujqësia dhe bujqit janë në qendër të vëmendjes dhe është e vërtetë që institucionet me përkrahjen e tyre kanë filluar t’i lëvizin gjërat në drejtim pozitiv, por ne nuk guxojmë të kënaqemi me të arriturat e deritashme dhe nuk guxojmë të ndalemi”, deklaroi ai.

Ndryshe, në këtë prezantim kanë marrë pjesë edhe kryetari i komunës së Vushtrrisë, Bajram Mulaku, kryetari i OEAK-ut, Arian Zeka, si dhe përfaqësues të shumtë të bizneseve dhe agrobizneseve.