Sa paguajnë tatime këngëtarët kosovarë?

Sipas ligjeve në fuqi, secili individ a subjekt që ushtron veprimtari ekonomike, është i obliguar të deklarojë fitimin dhe të paguajë tatim

Shumica e këngëtarëve në Kosovë paguajnë tatime. Mbi gjysmë milioni euro, është shuma që pjesëtarët e estradës kanë paguar në arkën e shtetit për vitin 2018.

Kështu thanë për Radio Kosovën zyrtarë të ATK-së. Sipas ligjeve në fuqi, secili individ a subjekt që ushtron veprimtari ekonomike, është i obliguar të deklarojë fitimin dhe të paguajë tatim, përcjell albinfo.ch.

Ndonëse janë kritikuar që nuk paguajnë tatime ndaj shtetit, artistët kosovarë tashmë kanë filluar të jenë shumë më të zellshëm në kryerjen e këtyre obligimeve tatimore.

Met Elshani, menaxher i artistit të ri, Fero, dhe shumë artisteve të tjerë, ka thënë se janë tatimpagues të rregullt.

“Po, dua të tregoj se jemi tatimpagues të rregullt dhe se të gjitha obligimet mujore dhe ato tre mujore i paguajmë”.

Paksa i ashpër u tregua menaxheri i reperit Gjiko, Granit Muhaxheri, i cili tha se paguajnë tatime dhe sipas tij, nuk u takon gazetarëve dhe askujt tjetër të di se sa paguajnë.

“Paguajmë mjaft tatime. Nuk ka rëndësi sa. Nuk i takon kjo askujt. Se di pse po pyet më shumë!”, ishte përgjigja e menaxherit të reperit të famshëm kosovar Gjiko.

Valentina Bytyqi, zëdhënëse në Administratën Tatimore të Kosovës, ka thënë se duke iu referuar vitit 2018, kategoria e këngëtarëve i kanë kryer obligimet tatimore, aq sa kanë deklaruar.

“Duhet pasur parasysh që edhe këngëtarët edhe secili tatimpagues mund të deklarojnë dhe të mos paguajnë apo deklarojnë jo real krahas asaj që kanë krijuar. Mirëpo, këngëtarët jo siç raportohet që po i ikin tatimit, vërehet që shifrat flasin diçka tjetër.  Në vitin e kaluar këngëtarët kanë paguar mbi gjysmë milion euro”, ka thënë Bytyçi për Radio Kosovën.

Administrata Tatimore e Kosovës ka thënë se gjatë këtij viti do të përqendrohen te kjo kategori, sidomos gjatë sezonit të verës kur aktivitetet janë shumë më të mëdha, dhe ndaj të gjithë atyre që tentojnë t’u shmangen obligimeve tatimore do të veprojnë në bazë të dispozitave ligjore që janë në fuqi.

---