Lugano fiton si mysafire, falë Drilon Paçarizit

FC Lugano, klubi që luan në Challenge league ka shënuar fitoren e tretë me radhë në këtë sezon. Në ndeshjen kundër FC Wil-it në Wil, skuadra nga pika më jugore e Zvicrës ka fituar me rezultat 2:1.

Goli i parë në ndeshje është shënuar në fillim të saj, gjegjësisht në minutën e tetë nga Samir Fazli, shqiptari nga Maqedonia i ardhur rishtas në Zvicër nga Holanda.

Por, trimi i ndeshjes ka qenë shqiptari tjetër, Drilon Paçarizi i Luganos. Pos që ka shënuar golin e fitores në minutën e 78-të, ish lojtari i Locarnos, i rritur në Gjenevë, ka përgatitur edhe golin e parë. Atë që e ka shënuar bashkëlojtari i tij Sergio Cortelezzi në pjesën e parë të lojës.

Paçarizi, në 11 ndeshjet e deritashme të këtij sezoni ka shënuar katër gola. Klubi i tij zë vendin e katërt në Challenge-Leagaue.