Studentët zviceranë sot i bashkohen qendrës ‘TERMOKISS’ në Prishtinë

Studentët e ‘Universitetit të Cyrihut- Departamenti i Arteve’, do t’i bashkohen sot qendrës ‘Termokiss’ në Prishtinë.

Sot nga ora 10:00, studentët e ‘Universitetit të Cyrihut- Departamenti i Arteve’, do t’i bashkohen qendrës ‘Termokiss’, të cilët së bashku me pjesëmarrësit e tjerë do të eksplorojnë dy dimensione: Si reflekton Prishtina me të tashmen e saj, në temën e të përbashkëtës ose publikes dhe si do ta mirëpresë Prishtina edicionin e 14-të të bienales nomade evropiane – “Manifesta 2022”, përcjell albinfo.ch.

Sipas organizatorëve, kjo ngjarje do të realizohet me një shëtitje në tri lokacione, ku gjatë ecjes i pranishëm do të jetë edhe organizatori i ‘Prishtina Mon Amour”, Tobias Bienz, i cili do të tregojë për projektet që janë realizuar për revitalizimin e hapësirave të cilat do të vizitohen.

Po ashtu të pranishmit do të kenë mundësi të dëgjojnë edhe arkitekten Eliza Hoxha, e cila do të shpalosë historinë e këtyre hapësirave dhe gjendjen e tyre të tanishme.

Ecja do të fillojë nga ora 10:00, kurse vendtakimi fillestar do të jetë tek ‘New Born’ në Prishtinë.

---