Amir Rrahmani, i lumtur për paraqitjen e skuadrës ndaj Juventusit

Qendërmbrojtësi i Kombëtares së Kosovës, Rrahmani, luajti tërë ndeshjen, pasi është titullar i pazëvendësueshëm

Mbrojtësi kosovar i Hellas Verona, Amir Rrahmani, beson se skuadra e tij bëri një paraqitje shumë të mirë kundër Juventusit, me gjithë humbjen 2:1 të shtunën në Serie A.

Aaron Ramsey me golin e tij debutues dhe Cristiano Ronaldo nga penalltia i siguruan kampionit në fuqi Juventus fitoren ndaj Veronës në Allianz Stadium, raporton Gazeta Express.

Qendërmbrojtësi i Kombëtares së Kosovës, Rrahmani, i cili luajti tërë ndeshjen pasi është titullar i pazëvendësueshëm, nuk mundi ta shpëtojë skuadrën verdhekaltër nga humbja e dytë radhazi, përkundër paraqitjes së mirë që pati, pasi përballë kishte yje si Cristiano Ronaldo dhe Paulo Dybala.

25-vjeçari – që iu bashkua Veronës këtë verë nga Dinamo Zagreb – beson se skuadra e tij bëri paraqitje të mirë, edhe pse humbi dhe dëshiron që ajo tani të përqendrohet në ndeshjet e radhës.

“Paraqitje e mirë nga ekipi sot. Përqendrimi në ndeshjet e radhës”, shkroi Rrahmani në Instagram.

Pas katër ndeshjeve të para në Serie A, Verona renditet e 13-ta me katër pikë, pas dy humbjeve, një barazimi dhe një fitoreje, përcjell Albinfo.ch.

---