PDK akuzon VV-në për blerje votash në Prizren

Partia Demokratike e Kosovës ka akuzuar Lëvizjen Vetëvendosje për blerje të votave në Prizren

Në bazë të informacioneve të PDK-së nga terreni, të raportuara nga komisionerët dhe vëzhguesit e akredituar nga KQZ-ja, informohet opinioni i gjerë publik se Lëvizja Vetëvendosje nga ethet dhe frika e kapluar për humbjen që do ta pësojë sot nga sovrani, ka filluar me të madhe, madje edhe në mënyrë publike blerjen e votave në Prizren, thuhet në komunikatë.

Rasti është raportuar në polici, ka ndodhur rreth orës 10:00 në Qendrën e Votimit 2003a, në ambientet e SHFMU “AbdylFrashëri” është zënë në flagrancë një aktivist i VV-së duke blerë vota.

Personi i njëjtë është zënë edhe duke fotografuar votën në vendvotim me telefon, në të cilin kishte të ngjitur sloganin e VV-së, thuhet në njoftimin e Partisë Demokratike.

Për rastin në fjalë, personin e zënë në flagrancë, Policia e Kosovës e ka shoqëruar në stacionin policor, i cili në këto momente është duke u intervistuar, sipas procedurave ligjore në polici.

PDK, Dega në Prizren, shpreh shqetësimin për rastet në fjalë, andaj u bën thirrje qytetarëve të komunës së Prizrenit që të mos bien preh e manipulatorëve të vullnetit të popullit, por ta shfrytëzojnë të drejtën e tyre ligjore dhe qytetare, për të votuar lirshëm dhe sipas bindjeve të tyre, shkruan insajderi, përcjell albinfo.ch.

 

---